..:: MaDoRaDwAn ::..
Admin
عدد الرسائل : 351
تاريخ التسجيل : 24/06/2008
 | موضوع: إحترم نفسك.. لسه فيكى رجالة يامصر  الخميس أغسطس 21, 2008 11:44 am | |
| السلام عليكم و رحمة الله و بركاته
حد سمع عن حمله احترم نفسك ....لسه فيكي رجاله يامصر .
انا
حبيت انقل الخبر ده للمنتدي الجميل وعاوزه اعرف راي الاعضاء عن الحمله دي
وانا شايفه اننا بجد بقينا محتاجينها واللي بيدخل علي الfacebook
هيفهم كلامي اكتر ...........
وهي :
حملة بدأها شباب مجلة كلمتنا شهر مايو وهنستمر فيها لحد مانعمل فرق !
قول "احترم نفسك"
لكل واحد بيتعدي على حرية الاخرين ..
لكل واحد شايف نفسه على البنات ..
لكل واحد بيضايق بنت في الشارع... بكلمة..بنظرة ..بلمسة...مش فارقة..
المهم ان خلاص بقى مش هنسكت ..!
عشان لسه فيكي رجالة يامصر !
عملنا استفتاء بين 100 شاب و شابه وجدنا نتائج مخيفة
1- 94% من البنات تعرضن للتحرش ونشك ان الباقي فاهم أصلا يعني إيه تحرش؟
2- 50 % رد فعلهم سلبي
3- 64 % بتخاف تحكي لأهلها !!
سألنا الشباب رد فعلهم لو شافوا ولد بيتحرش ببنت
14 % منهم قال "ماليش دعوة "
34 % قال هتدخل لكن بشرط تكون محترمة !
20 % قال لو شكلها مش محترم هعاكس معاهم !!
ده غير حكايات البنات اللي بتوصل على إيميل المجلة كل يوم ..حكايات تخلي الحجر يتحرك ...!!
مستني إيه محتاجينك معانا في الحمله يمكن أكتر من البنات...
محتاجينك عشان نحمي اختك والدتك ،زوجتك انها تتعرض لأي أذى من أي حد !
محتاجينك تبقي أقوى تعرفي حقوقك ...متخليش حد ينتهك حريتك ...عايزينك تبقي أجرأ..متخافيش..
احنا عايزين إيه من الحملة؟
- عايزينك تعرف إيه هو التحرش ؟
- عايزينك تتعلمي إزاي تتصرفي لو حد ضايقك في الشارع
- نفكر كلنا في طرق مبتكرة تحمي بيها البنت نفسها
- عايزين الولاد يعرفوا قد إيه الحكاية دي مؤذية لكل بنت
- نرجع تاني نخوة ولاد البلد لما كان واحد يشوف بنت بتتعاكس
- عايزين الأهالي تعلم بناتها إزاي تتصرف ويكون ليها رد فعل لو اتعرضت لأي حاجة في الشارع
- عايزين الأهالي تفهم ان البنت ضحية مش عشان اتعاكست يبقي لازم تكون هي السبب
- عايزين قانون واضح ضد التحرش عشان من حقنا كلنا نعيش بحرية.........!
- ويمكن نتستغني عن ده كله لولقينا من تاني نخوة ولاد البلد...الشهامة ...الجدعنة...الدم الحامي ...باختصار معنى الرجولة !
إزاي ؟
- هنعمل لقاءات شبابية هنتكلم فيها عن كل حاجة ... وهيشاركنا فيها متخصصين في الطب النفسي والدفاع عن النفس وحقوق المرأة.
- انتاج فيديو كليب يشارك فيها الشباب والنجوم.
- هننزل الشوارع - الجامعات – الكافيهات وفي كل مكان ...
تعمل إيه علشان تشارك معانا في الحملة؟
- تشاركنا..تقول لكل أصحابك ..اكتب معانا في مجلة.كلمتنا...شاركنا بتجاربك..أراءك ...
شاركنا في لقاءتنا الشبابية وورش العمل اللي بنظمها خلال الحملة...
| |
|
